وهڙي ڀرسان دبر واري علائقي ۾ مڪاني چونڊن واري ڏينهن الله جڙيو جاگيراڻي پولنگ اسٽيشن تي ٻن ڌرين ۾ جهيڙي دوران فائرنگ ۾ نوجوان عبدالقدير جاگيراڻي جي قتل بعد تڪرار وڌي ويو آهي. ٻنهي ڌرين جي ماڻهن دُبر لڳ ريلوي ٽريڪ وٽ هٿيارن سان هڪٻئي تي فائرنگ ڪري ڏني، جنهن ۾ گوليون لڳڻ سبب دينو جاگيراڻي، عثمان جاگيراڻي سميت 5 ڄڻا سخت زخمي ٿي پيا، جيڪي ڪيتري دير تائين ريلوي ٽريڪ تي پيل رهيا. فائرنگ سبب علائقو جنگ جو ميدان بنجي ويو. ان دوران مختلف ريلوي اسٽيشن تي روهڙي ۾ عوامي ايڪسپريس، سانگي ويجهو خيبر ميل ٽرين، مهيسرو ۾ شاهه حسين ايڪسپرين کي روڪيو ويو. هوڏانهن ڪيترن ئي ڪلاڪن بعد سکر ضلعي جي مختلف ٿاڻن جي پوليس جي وڏي نفري علائقي ۾ پهچي صورتحال تي ضابطو آندو. ياد رهي ته مڪاني چونڊن واري ڏينهن تي يوسي پنهوار جي پولنگ اسٽيشن الله جڙيو تي جاگيراڻي برادري جي ٻن ڌرين ۾ پراڻي تڪرار تان فائرنگ ٿي. جنهن ۾ عبدالقدير جاگيراڻي قتل ٿيو ۽ 7 سالن جي نياڻي تانيه سميت دينو بلال عثمان زخمي ٿي پيا ھئا، جن کي سکر جي خانگي اسپتال حرا ميڊيڪل سينٽر منتقل ڪيو ويو.
