حيدرآباد ۾ هوٽل تي جهيڙي دوران نوجوان جي قتل تي ڪراچي جي علائقي سهراب ڳوٺ ۾ احتجاج ڪندي مڇريل ماڻهن ال آصف اسڪوائر ويجهو گاڏي کي باهه ڏئي ساڙي وڌو، سهراب ڳوٺ ويجهو جمعي تي به وڳوڙي واقعن دوران پوليس بروقت ڪارروائي ڪري 15 ڄڻن کي گرفتار ڪري ورتو. ڊي ايس پي سهراب ڳوٺ سهيل فيض مطابق هٿياربند ٽولن سهراب ڳوٺ ۾ ال آصف اسڪوائر ويجهو گاڏي کي باهه ڏئي ڇڏي. ان موقعي تي ڊي ايس پي سهراب ڳوٺ چوڌري سهيل فيض جي ٽيم ٿڏي تي پهچي ڪارروائي ڪئي ۽ ڪار ساڙڻ ۽ وڳوڙ ڪرڻ ۾ ملوث 15 ماڻهن کي گرفتار ڪري ٿاڻي پهچائي ڇڏيو. ڊي ايس پي چوڌري سهيل فيض ٻڌايو ته گذريل ڏينهن هنگامن دوران 150 ماڻهن کي گرفتار ڪيو ويو هو. پوليس گرفتار ۽ فرار جوابدارن جي خلاف سهراب ڳوٺ ٿاڻي ۾ ڪيس داخل ڪري ورتا آهن، جڏهن ته ڏاڍ ڪري دڪان بند ڪرائيندڙ جوابدارن جي خلاف مبينه ٽائون ٿاڻي ۾ ڪيس داخل ڪيو ويو آهي پوليس سهراب ڳوٺ جي آس پاس مان هن وقت تائين 165 ماڻهن کي گرفتار ڪري ورتو آهي، جڏهن ته ڪيسن ۾ 55 ماڻهو گرفتار آهن جڏهن ته ٻين کان جاچ ڪئي پئي وڃي.
