صوبائي ڪابينا صوبي جي ضلعي انتظاميا کي هدايت ڪئي آهي ته انساني جانين جي نقصان، گهرن، فصلن جي نقصان، روڊن جو ڄار ۽ نيڪالي واري سسٽم جو ڪاٿو لڳائڻ شروع ڪيو وڃي ته جيئن متاثرن کي معاوضو ڏيڻ لاءِ وفاقي حڪومت سان رابطو ڪيو وڃي. سنڌ جي وڏي وزير مڪاني ادارن واري کاتي کي هدايت ڪئي ته ڪراچي ۽ ٻين ضلعن ۾ ٽٽل روڊن ۽ نيڪال واري لائينن جي مرمت ڪرائي وڃي. هن اهڙو فيصلو ڪالهه وزيراعليٰ هائوس ۾ ڪابينا اجلاس جي صدارت ڪندي ڪيو. اجلاس ۾ صوبائي وزيرن، صلاحڪارن، خاص مددگارن، چيف سيڪريٽري، چيئرمين پي اينڊ ڊي ۽ ٻين لاڳاپيل آفيسرن شرڪت ڪئي. ڪابينا کي ٻڌايو ويو ته تيز برساتن صوبي جي شهري ۽ ٻهراڙي وارن علائقن ۾ تباهي مچائي ڇڏي آهي. وڏي وزير جي زراعت بابت صلاحڪار منظور وساڻ چيو آهي ته کجيءَ جو فصل تيار ٿي چڪو آهي پر خيرپور ۾ تيز برساتن سبب هارين کي اربين رپين جو نقصان پهتو آهي. هن صوبي ۾ خريف جي فصلن کي نقصان جو معاملو پڻ اٿاريو. سنڌ ڪابينا جي سفارش تي سنڌ جي وڏي وزير صوبي جي سمورن ڊپٽي ڪمشنرن کي هدايت ڪئي ته اهي جاني نقصان، ڪچي ۽ پڪي گهرن، روڊن جي ڄار، نيڪال سسٽم سميت سمورن نقصانن جو جائزو وٺن ته جيئن معاوضي جي منظوري لاءِ وفاقي حڪومت سان رابطو ڪجي. هن وڌيڪ چيو ته سندس حڪومت به پنهنجي وسيلن سان متاثر ماڻهن جي مدد ڪندي. ڪابينا 53 تعليمي ادارن کي هلائڻ لاءِ سيڪريٽري اسڪول ايجوڪيشن جي سربراهي ۾ 7 رڪني مئنيجمينٽ بورڊ ٺاهڻ جي تجويز جي منظوري ڏئي ڇڏي، جنهن ۾ 31 اسڪول ۽ 22 مدرسن کي ايف اي ٽي ايف جي شرطن تي پورو ڪرڻ لاءِ پنهنجي تحويل ۾ ورتو آهي. تعليم واري وزير سردار شاهه ڪابينا کي ٻڌايو ته سندس کاتي سمورن تعليمي ادارن جي انتظامن جي نگراني لاءِ قدم کنيا آهن. هن وڌيڪ چيو ته مدرسن کي هلائڻ لاءِ مئنيجمينٽ بورڊ مقرر ڪيو ويو آهي. انتظاميا کي تعليمي ادارن کي هلائڻ جي ذميواري سونپي وئي آهي. اجلاس جي شروعات ۾ ڪابينا ميمبرن آرمي هيليڪاپٽر حادثي تي افسوس جو اظهار ڪيو. ڪابينا سنڌ بلوچستان ۾ تيز برساتن سبب فوت ٿيلن لاءِ فاتحه پڻ پڙهي. ڪابينا کي ٻڌايو ويو ته پيپلز بس سروس جي سمورن ستن روٽن جي روڊن ۽ نيڪال جو سسٽم مختلف هنڌن تي خراب آهي. هڪ نئين بس سروس شروع ڪئي وئي آهي، مناسب رستن ۽ نيڪال جي نظام سان ان کي جاري رکڻ ۾ مدد ملندي. ڪابينا ڪي ايم سي، ڪي ڊي اي ۽ واٽر بورڊ ذريعي مرمتي ڪم لاءِ 1 ڏهائي 5 ارب رپين جي منظوري ڏني. ڪابينا ڳوٺن جي سولرائيزيشن لاءِ متبادل توانائي جهڙوڪ سولر پي وي ٽيڪنالاجي فراهم ڪرڻ لاءِ توانائي کاتي جي تجويز جي منظوري ڏني. توانائي واري وزير امتياز شيخ ڪابينا کي ڄاڻ ڏيندي چيو ته ڳوٺن کي بجلي فراهم ڪرڻ لاءِ مني/مائڪرو گرڊ، سولر هوم سسٽم لڳايو ويندو. امتياز شيخ چيو ته وليج اليڪٽريڪل پلان تحت ڳوٺن کي بجلي فراهم ڪرڻ لاءِ سولر هوم سسٽم لڳايو ويندو. هن چيو ته ڳوٺن جي سولرائيزيشن منصوبي تحت ڳوٺن کي بجلي ڏيڻ لاءِ تڪڙو ۽ اقتصادي حل ثابت ٿيندو. ڪابينا ان تجويز جي منظوري ڏني ۽ وڏي وزير توانائي کاتي کي هدايت ڪئي ته ڊويزنل سطح تي انهن ڳوٺن ۾ جن ڳوٺن ۾ بجلي ناهي اتي سولرائيزيشن لاءِ پري ڪواليفائي ڪري. ڪابينا هڪ اين جي او جي درخواست تي چلڊرن آف آدم کي ڪراچي جي ڳوٺ ڪونڪر ۾ نيوروسائيڪائٽرڪ سينٽر قائم ڪرڻ لاءِ 10 ايڪڙ زمين جي منظوري ڏني. قيمت طئي ڪرڻ واري ڪميٽي زمين جي مارڪيٽ اگهه 13 ملين رپيا في ايڪڙ مقرر ڪئي پر ڪابينا مارڪيٽ اگهه کان 50 سيڪڙو گهٽ يعني 65 لک رپيا في ايڪڙ جي منظوري ڏني. اطلاعات واري وزير ڪابينا کي ٻڌايو ته حيدرآباد پريس ڪلب کي 75 ايڪڙ زمين ڏني وئي آهي. هن وڌيڪ چيو ته ڪلب جي اداري سي وي ٽي، رجسٽريشن فيس ۽ ٻين ٽيڪسن کان ڇوٽ جي درخواست ڪئي آهي. ان تي روينيو واري وزير مخدوم محبوب چيو ته ڇوٽ بابت ڪابه گرانٽ ناهي. هن تجويز ڏني ته ڪابينا پريس ڪلب کي پنهنجو ٽيڪس ادا ڪرڻ لاءِ گرانٽ ڏئي، جنهن جي ڪابينا منظوري ڏئي ڇڏي. ڪابينا سنڌ پبلڪ سروس ڪميشن (فنڪشنز) رولز 2022 جي منظوري ڏئي ڇڏي. ڪابينا سنڌ حڪومت ۽ سنڌ پوليس جي جعلي نمبر پليٽن سان روڊن تي هلندڙ گاڏين جو سخت نوٽيس ورتو ۽ ايڪسائيز اينڊ ٽيڪسيشن کاتي کي هدايت ڪئي ته اهڙين گاڏين خلاف ڪريڪ ڊائون شروع ڪيو وڃي. کاتو اهڙين گاڏين کي ضبط ڪري گاڏين جي مالڪن خلاف سخت ڪارروائي ڪندو.
