مدئجي ويجهو ڳوٺ فقيرپور بروهي جي گرلز پرائمري اسڪول ۾ گڏهه بيهارڻ واري خبر جو سيڪريٽري تعليم نوٽيس ورتو، جنهن جي هدايت تي ماسترياڻين جي شڪايت جي ازالي لا تعلقه ايجوڪيشن آفيسر فيميل آپا ذڪيا پٺاڻ اسڪول پهچي دورو ڪري ماسترياڻين کان معلومات ورتي، جنهن دوران ٽي اي او فيميل اسڪول ۾ نون ڀرتي ٿيل ماسترياڻين کان سوشل ميڊيا تي شڪايتن واري ويڊيو جاري ڪرڻ بابت سخت پڇاڻو ڪيو. ان موقعي تي تعلقه ايجوڪيشن آفيسر آپا ذڪيا پٺاڻ ڳالهائيندي چيو ته اسڪول ۾ گڏهه بيهارڻ واري مامري جي جاچ لا پهتي آهيان، اسڪول ۾ هن وقت گڏهه بيٺل ناهي. اسڪول بلڊنگ زبون حال هجڻ بابت هن چيو ته جيڪو ڪم اسان جي هٿ ۾ ناهي ۽ اهو ڪم ايجوڪيشن ورڪس جو آهي. هن چيو ته اسڪول اندر بنيادي سهولتون فرنيچر ۽ پاڻي جو سهولتون ايندڙ هفتي تائين مهيا ڪيون وينديون. تعلقي ڳڙهي ياسين ۾ ڪوبه اسڪول بند ناهي، روزانو جي بنياد تي مان اسڪولن جا دورا ڪندي آهيان، باقي اسڪول اندر گڏهه بيهارڻ واري ويڊيو جو نوٽيس وٺي ڳوٺاڻن کي چتا ڏنو آهي ته جيڪڏهن هتي ٻيهر گڏهه بيهاريو ويو ته سندن خلاف قانوني ڪارروائي ڪئي ويندي.
