خانپورمهر ويجهو برسات دوران پراڻو مهرو واهه کي هٿرادو ڪٽ لڳڻ ڪري بي گهر ٿيل عورتن، مردن توڙي ٻارن مظاهرو ڪري ڌرڻو هنيو. ان موقعي تي ايوب لاشاري، سلطان لاشاري، يونس لاشاري، گل لاشاري، عزيز لاشاري ۽ ٻين چيو ته برسات دوران پاڻي اسان جي سموري ڳوٺ کي لوڙهي ويو آهي. اسين ٻچن سميت روڊن تي ويٺل آهيون، هن مهل تائين انتظاميہ نه ٽينٽ ڏنا آهن ۽ نه وري راشن ڏنو آهي. ٻچا بکون ڪاٽڻ تي مجبور آهن. گهر ڊهي وڃڻ ڪري بي گهر ٿي ويا آهيون. بيمارين ڪر کنيو آهي، ڪيترائي ٻار بيمارين ۾ مبتلا ٿي ويا آهن. برسات متاثر ڳوٺاڻن سردار محمد بخش خان مهر، سردار علي گوھر خان مھر، بنگل خان مهر ۽ انتظاميه کان مطالبو ڪيو ته فوري طور واهر ڪئي وڃي، ٻي صورت ۾ ٻچا بُک وگهي مري ويندا.
