ڪراچي جي راشد منهاس روڊ ويجهو پوليس مقابلي ۾ 2 جوابدار مارجي ويا. جوابدارن استنبول کان آيل فئملي کي لٽيو هو. پوليس مطابق متاثر فئملي 15 تي اطلاع ڏنو، جنهن کان پوءِ نيپا پل تي پوليس جي جوابدارن سان فائرنگ جي ڏي وٺ ٿي. پوليس ٻڌايو ته گلشن جمال ويجهو ٿيل مقابلي ۾ 2 ڏوهاري مارجي ويا، جڏهن ته هڪ کي زخمي حالت ۾ گرفتار ڪري ورتو. جوابدارن جا 2 ساٿي زخمي حالت ۾ فرار ٿي وڃڻ ۾ ڪامياب ٿي ويا. متاثر شهري ٻڌايو ته استنبول کان واپسي تي فئملي سان گڏ ايئرپورٽ مان نڪتا هئاسين ته موسميات کاتي ويجهو گاڏي سوار ڦورن رانگ سائيڊ کان اسان جي گاڏي کي روڪيو. هن ٻڌايو ته گاڏي تان لهندي ئي ڦورن اسان تي تشدد ڪرڻ شروع ڪيو، جوابدار اسان کان موبائيل فون، 800 ڊالر ۽ ٻيون شيون ڦري فرار ٿي ويا. هڪ موبائيل بچي وئي، جنهن تي اسان 15 تي پوليس کي اطلاع ڏنو. ڄاڻايل شهري ٻڌايو ته ايس ايڇ او عزيز ڀٽي عديل افضل بهادري سان ڦورن جو مقابلو ڪيو، اسان کي پنهنجي پوليس جي بهادري تي ناز آهي.
