مدئجي جي شيخ محلي جي رهواسي دلدار عرف پپن جتوئي جي گهر تي مدئجي پوليس رات جي وقت چڙهائي ڪري چادر ۽ چوديواري جو تقدس پائمال ڪندي گهر ۾ ڪاهي پئي. پوليس گهر ۾ گهڙي تلاشي بهاني گهر ۾ ستل عورتن ۽ ٻارن تي تشدد ڪيو ته گهر ڀاتين ۾ ڪيهاٽ پئجي ويا. جنهن دوران هڪ نينگري 8 ورهين جي دعا جتوئي بيهوش ٿي وئي، جنهن بعد پوليس اهلڪار واپس موٽي ويا. ان سلسلي ۾ گهر ڀاتين عبدالستار، قادر جتوئي، گلزار جتوئي، سرداران خاتون ۽ ٻين پوليس خلاف دانهيندي چيو ته مدئجي ٿاڻي جي اهلڪارن احسان بروهي، عاشق ڪيهر ۽ ٻين گهر ۾ گهڙي ننڊ ستل عورتن توڙي مردن کي وحشياڻي تشدد جو نشانو بڻايو. اسان جو برادري جي ماڻهن سان سڱاوتي تان تڪرار هلندڙ آهي، جنهن تان پوليس گهر ۾ گهڙي ناحق ڪيو آهي. جڏهن ته پوليس چار ڏينهن اڳ اسان جي نوجوان پپن جتوئي کي گرفتار ڪيو هاڻي وري گهر ۾ گهڙي ننڊ پيل عورتن مٿان وحشياڻو تشدد ڪيو آهي. هنن چيو ته پوليس تشدد ۾ 8 ورهين جي معصوم نينگري دعا جتوئي بيهوش ٿي وئي، جنهن کي اسپتال منتقل ڪيو ويو. نوٽيس وٺي انصاف ڪيو وڃي.
