مٽياري: مٽياري ويجهو عورت جو لاش زرعي زمين مان مليو، وارثن قتل جو شڪ ڏيکاري ڇڏيو. مٽياري لڳ عورت لڇمي زال ڏيوو ڪولهي جو لاش زرعي زمين مان مليو، اطلاع تي پوليس پهچي وئي، پوليس لاش کڻائي اسپتال آندو، جتان ضروري ڪارروائي بعد لاش وارثن حوالي ڪيو ويو. ان سلسلي ۾ عورت جي والد ويرو ڪولهي جو چوڻ آهي ته منهنجي ڌيءَ کي گهٽا ڏئي قتل ڪيو ويو آهي. هن گهر ڪئي ته نوٽيس کڻي شفاف جاچ ڪرائي انصاف ڪيو وڃي. هوڏانهن رابطو ڪرڻ تي عورت جي مڙس ڏيوو ڪولهي جو چوڻ آهي ته منهنجي زال خودڪشي ڪئي آهي. جڏهن ته ايس ايڇ او مٽياري چيو ته مڙس چوي ٿو ته زال ڪاوڙجي خودڪشي ڪئي آهي، هاڻ پوسٽ مارٽم بعد حتمي ڳالهه ڪري سگهبي.
