ميرپورخاص: ميرپورخاص ۾ وين موٽرسائيڪل سان ٽڪرائجي ڪلٽي ٿي پئي، چاچي ۽ ڀائٽي سميت 3 ماڻهو فوت ٿي ويا ۽ 5 زخمي ٿي پيا. رپورٽ موجب ميرپورخاص ۾ پراڻي ميرپور ٿاڻي جي حد ميرپورخاص-سانگهڙ روڊ تي تيز رفتار وين موٽرسائيڪل کي ٽڪرائجي ڊرائيور جي ڪنٽرول مان نڪري روڊ ڀرسان ڪلٽي ٿي کاهي ۾ ڪري پئي، جنهن سبب موٽرسائيڪل سوار ڳوٺ پير بخش خاصخيلي جو رهواسي 40 ورهين جو مولا بخش خاصخيلي ۽ سندس ڀائيٽو 27 ورهين جو الله بچايو عرف پوڙهو خاصخيلي ٿڏي تي فوت ٿي ويا، وين ڪلٽي ٿيڻ سبب وين ۾ سوار ڪاٺڙي واسي 24 سالن جو نوجوان چندر ڀيل پڻ فوت ٿي ويو، حادثي ۾5 ڄڻا زخمي ٿي پيا، جن ۾ 25 سالن جو لڇمڻ، ٻن سالن جو روشن، 45 سالن جو عبدالجبار، 40 سالن جو شاهد ۽ هڪ عورت خديجه شامل آهن. واقعي جي اطلاع تي پوليس پهچي فوتين جا لاش ۽ زخمين کي کڻائي سول اسپتال منتقل ڪيو. هوڏانهن هڪ گهر جي ٻن ڀاتين جي فوت ٿيڻ تي وارث سول اسپتال پهچي زارو قطار روئيندا رهيا، قانوني ڪارروائي بعد فوتين جا لاش وارثن حوالي ڪيا ويا، جيڪي گهر آندا ويا ته ڪهرام مچي ويو. کاڻ پوليس وين کي تحويل ۾ ورتو. ڪيس داخل نه ٿيو.
