ڪوٽڙي: ٽي ڏينهن اڳ ميرپورخاص مان مبينا اغوا ڄاڻايل عورت اقبال خاتون کي پوليس ڪوٽڙي جي سبحان الله ڪالوني جي گهر مان هٿ ڪري ورتو. ان حوالي ڪوٽڙي ٿاڻي تي آندل عورت اقبال چنا ٻڌايو ته پٽ سان ڏيتي عيوض مون کي جوابدارن غلام سرور سميت 8 ڄڻن اغوا ڪري ٽن ڏينھن تائين باندي بڻائي مختلف علائقن ۾ رکيو، جنهن بعد پوليس هٿ ڪيو آهي. ٻئي طرف الزام هيٺ آيل سرور ناريجي ٻڌايو ته عورت اسان جي ڀاڻيجي آھي، ان کي اغوا ناهي ڪيو، هو پاڻ اسان وٽ آئي هئي، سندس پٽ سرويچ ڪروڙن رپين جو فراڊ ڪيو آهي، جنهن خلاف ٿرڙي محبت سميت دادو ۽ ٻين ٿاڻن تي ڪيس ٿيل آھن، سرويچ اسان جا به 40 لک رپيا ڦٻايا آهن. ياد رهي ته عورت جي مڙس عبدالحميد چنا وومين پروٽيڪشن سيل ميرپورخاص ۾ درخواست داخل ڪرائي ھئي ته سندس زال اقبال بيگم کي ناحق باندي بڻايو ويو آهي.
