حيدرآباد: حيدرآباد ۾ عيدالفطر جي نماز جو مرڪزي وڏو اجتماع عيدگاھه راڻي باغ ۾ ٿيندو. حيدرآباد شھر لطيف آباد، قاسم آباد ۽ حيدرآباد ٻھراڙي تعلقي سميت حيدرآباد ضلعي جي سمورن شھرن ۽ ڳوٺن جي مسجدن، امام بارگاھن، عيد گاھن ۽ کليل ميدانن تي عيد نماز ادا ڪئي ويندي. حيدرآباد ۾ قدم گاھه مولا علي عه تي به عيدنماز جو وڏو اجتماع ٿيندو.
عيد جي موقعي تي حيدرآباد پوليس طرفان سيڪيورٽي پلان جوڙيندي مسجدن، امام بارگاھن، عيد گاھن ۽ کليل ميدانن تي عيد نماز پڙھندڙن لا سيڪيورٽي لا پوليس اھلڪار مقرر ڪيا ويا آهن. حيدرآباد جي بازارن ريشم بازار، شاھي بازار مان عورتن توڙي ٻارن عيد واري رات به خريداري ڪئي. چوڙين ۽ ميندي جي وڏي پئماني تي خريداري ڪئي وئي. ڪپڙن جي رنگن مطابق چوڙيون خريد ڪري عيد جي رنگ کي رنگين ڪيو ويو.
