لنڊن :لنڊن ۾ مسلم ليگ ن جي قائد ميان نواز شريف جي صدارت هيٺ پارٽي جو اهم اجلاس ٿيو، ٻن ڪلاڪن تائين جاري اجلاس ۾ وزيراعظم شهباز شريف ۽ سندس ڪابينا جي ميمبرن به شرڪت ڪئي. اجلاس ۾ فيصلو ڪيو ويو ته اڳوڻي وزيراعظم نواز شريف جي سزا خلاف اپيل داخل ڪئي ويندي. اجلاس ۾ گهرو وزير راڻا ثناءُ الله، منصوبابندي واري وفاقي وزير احسن اقبال، هوابازي واري وزير سعد رفيق، سڌ سماءَ واري وزير مريم اورنگزيب ۽ ٻيا اڳواڻ پڻ موجود هئا. اجلاس کانپوءِ وفاقي وزيرن مريم اورنگزيب، احسن اقبال ۽ راڻا ثناءُ الله ميڊيا سان ڳالهه ٻولهه ڪئي. ان موقعي تي گهرو وزير راڻا ثناءُ الله چيو آهي ته آئين جي ڀڃڪڙي ڪندڙن خلاف ڪارروائي ڪئي ويندي، اتحادين کي اعتماد ۾ وٺي ڪارروائي ڪئي ويندي. ملڪ ۾ ڪنهن به قسم جي انتشار جي اجازت نه ڏني ويندي، ملڪ ۾ بدامني ۽ بدمعاشي جو ڪلچر فروغ ڏنو پيو وڃي. راڻا ثناءُ الله چيو ته نواز شريف موجوده سياسي صورتحال کي منهن ڏيڻ لاءِ بهترين هدايت ڪئي آهي، اجلاس ۾ ڪيل فيصلن جي اتحادين کان منظوري ڏني ويندي. ان موقعي تي صحافي سوال ڪيو ته ڇا عمران خان کي گرفتار ڪيو ويندو؟ جنهن تي راڻا ثناءُ الله جواب ڏنو ته جيڪو به گرفتار ٿيندو ان کي گرفتار ڪيو ويندو. راڻا ثناءُ الله وڌيڪ چيو ته ن ليگ واضح موقف اختيار ڪري رهي آهي ته چونڊون جلد ٿيڻ گهرجن، ن ليگ وٽ چونڊون ڪرائڻ جو فيصلو ڪرڻ جو اختيار ناهي، اتفاق راءِ سان جيڪو فيصلو ٿيندو ان جا پابند آهيون. هن چيو ته انهن ماڻهن کي ريگيولر ڪرڻ لاءِ سائبر ڪرائم قانون کي مضبوط ڪيو پيو وڃي، اهي پهرين ڏينهن کان آءِ ايم ايف وٽ ويا آهن، ملڪي معيشت جي حالت کي ٺيڪ ڪرڻ جو فيصلو ڪيو ويو آهي، ان سان جيڪا بدبو پيدا ٿي آهي، ان کي بي نقاب ڪرڻو پوندو. راڻا ثناءُ الله چيو ته نواز شريف هر قيمت تي وطن واپس ايندو، هو وڃڻ چاهي ٿو. ڊي جي آءِ ايس پي آر جو بيان قومي تقاضائن موجب آهي. فواد چوڌري جي بيانن جي مذمت ڪريون ٿا. هن وڌيڪ چيو ته اڳوڻي حڪومت جي بدبو منظر عام تي آڻينداسين، ڪيس تمام ننڍا آهن، قوم سان کيڏيو ويو آهي، انهن کي قوم جي سامهون آندو ويندو. چونڊ سڌارا آڻينداسين، اوورسيز پاڪستانين جي نمائندگي لاءِ انتظام ڪنداسين. ووٽنگ مشين کي اڏائينداسين، فراح خان کي واپس آڻينداسين. ان موقعي تي مريم اورنگزيب چيو ته اجلاس ۾ فيصلو ڪيو ويو ته نواز شريف جي سزا خلاف اپيل داخل ڪئي ويندي.
