سرھاڙي: سرھاڙي ٽائون ڪميٽي جي وارڊ نمبر 5 لائين پار فقيرآباد پاڙي جي گھٽين مان گٽرن جو گندو پاڻي نيڪال نه ٿيڻ ڪري رھواسين ٽائون ڪميٽي انتظاميا خلاف گندي پاڻي مٿان علامتي جنازو ڪڍي هٿن ۾ بينر ۽ پلي ڪارڊ کڻي مظاهرو ڪري ڌرڻو هنيو ۽ ٽائون انتظاميا خلاف سخت نعربيازي ڪئي. ان موقعي تي زنگيجو اختر مڱھڻار، مرتضى جمالي ۽ ٻين چيو ته گٽرن جو گندو پاڻي گذريل ڪيترن ڏينهن کان گهرن ۽ مسجدن اڳيان بيٺل آهي، جنهن ڪري آزار ۾ آهيون، فقيرآباد پاڙي جا اڪثر علائقا گندي پاڻي جي تلائن ۾ تبديل ٿي ويا آهن، گهٽين ۾ گندگي جا ڍير لڳل آهن، پر ٽائون ڪميٽي جو صفائي وارو عملو وڏيرن جي اوطاقن تي مقرر ٿيل آهن، فقيرآباد پاڙي ۾ ڪو به ترقياتي ڪم ناهي ٿيو. هنن وڌيڪ چيو ته اسان ٽائون آفيسر رضا جان زرداري کي ڪيترائي ڀيرا شڪايت ڪئي، پر هو پبلڪ هيلٿ کاتي مٿان الزام هڻي موٽائي ٿو ڇڏي. هنن ڊي سي سانگھڙ عمران خواجا کان مطالبو ڪيو ته ڪرپٽ ٽائون آفيسر رضا جان زرداري خلاف ڪارروائي ڪري گندو پاڻي نيڪال ڪرائي صفائي ڪرائي وڃي.
