ڪراچي: ڪراچي ۾ ايم اي جناح روڊ تي بولٽن مارڪيٽ ويجهو ڌماڪي جي نتيجي ۾ هڪ عورت مارجي وئي ۽ 10 ڄڻا زخمي ٿي پيا آهن. ان حوالي سان ٻڌايو پيو وڃي ته ايم اي جناح روڊ تي نيو ميمڻ مسجد ويجهو ڌماڪو ٿيو، جنهن بعد باهه لڳي وئي. پوليس جو چوڻ آهي ته ڌماڪي ۾ پوليس وين کي نشانو بڻايو ويو ۽ ڌماڪي واري جاءِ تي سمورا دڪان ڪپڙن جا آهن. ٻئي طرف هنگامي صورتحال کي نظر ۾ رکندي بم ڊسپوزل اسڪواڊ جا اهلڪار به موقعي تي پهچي ويا. شروعاتي جاچ موجب بم موٽرسائيڪل ۾ نصب ڪيو ويو هو. اختيارين جو چوڻ آهي ته زخمين کي ويجهي اسپتال پهچايو ويو، جڏهن ته پوليس علائقي کي ڪڙو چاڙهي جاچ شروع ڪري ڇڏي آهي. ايم ايس سول اسپتال ڊاڪٽر روبينا ڌماڪي ۾ عورت جي مارجي وڃڻ جي تصديق ڪئي. هن چيو ته چئن زخمين جي حالت نازڪ آهي. اختيارين مارجي ويل عورت جي سڃاڻپ ثانيه طور ڪئي آهي.
