ميرپورخاص: ميرپورخاص ويجهو ٻن ڪارن ۾ ٽڪر ٿي پيو، عورت فوت ٿي وئي. سندس مڙس ۽ 4 ٻارن سميت 6 ماڻهو زخمي ٿي پيا. رپورٽ موجب ميرپورخاص ۾ تعلقي ٿاڻي جي حد 78 موري لڳ ٻن ڪارن ۾ ٽڪر ٿي پيو، جنهن جي نتيجي ۾ عورت گُڏي سميجو موقعي تي ئي فوت ٿي وئي، جڏهن ته سندس چار ٻار، مڙس عبدالغفار سميجو ۽ ٻي ڪار ۾ سوار نذر محمد لنجواڻي زخمي ٿي پيا، اطلاع تي پوليس پهچي وئي، جنهن فوتي عورت جو لاش ۽ زخمين کي کڻائي سول اسپتال آندو، جتان ضروري ڪارروائي بعد عورت جو لاش وارثن حوالي ڪيو ويو، پوليس ٻئي گاڏيون تحويل ۾ ورتيون، حادثي جو ڪيس داخل نه ٿي سگهيو. هوڏانهن عورت جو لاش گهر پهچڻ تي ڪهرام مچي ويو.
