ڊگھڙي: ڊگهڙي ڀرسان 2 معصوم ٻارڙا جمڙائو ڪئنال ۾ ٻڏي فوت ٿي ويا. خبر موجب ڊگهڙي ٿاڻي جي حد پراڻو دمبالو ويجهو ڳوٺ چوڌري سيف الله گل ڀرسان ويسٽ جمڙائو ڪئنال ۾ وهنجندي 2 گلن جهڙا معصوم ٻارڙا 8 ورهين جو دليپ پٽ رامو ڀيل ۽ 6 ورهين جو ڪشور پٽ پرسو ڀيل ٻڏي فوت ٿي ويا، اطلاع تي پوليس پهتي، جنهن بعد معصوم ٻارڙن جا لاش جمڙائو ڪئنال مان ٻاهر ڪڍيا ويا. وارثن وڌيڪ ڪا به قانوني ڪاروائي ڪرائڻ کان انڪار ڪيو، معصوم ٻارن جا وارث اصل اسلام ڪوٽ ڀرسان ڳوٺ جهانگاريو جا رهواسي آهن، ڊگهڙي ڀرسان مال چارڻ ۽ مزدوري لا آيل هئا ته واقعو پيش آيو. وارثن موجب ٻارڙن جون مائرون ڪپڙا ڌوئي رهيون هيون ۽ معصوم ٻارڙا ڀرسان ڪناري تي وهنجي رهيا هئا، اوچتو پير سلپ ٿيڻ ڪري واھه جي اونهي پاڻي جي وهڪري ۾ اچي ٻڏي ويا، معصوم ٻارڙن جا لاش گهر پهچڻ تي ڪهرام مچي ويو.
