حيدرآباد: سنڌ ترقي پسند پارٽي جي چيئرمين ڊاڪٽر قادر مگسي سنڌ جي اندر مڪاني چونڊن جي پهرين مرحلي ۾ ٿيندڙ رتوڇاڻ ۾ انساني جانين جي ضايع ٿيڻ ۽ سوين زخمي ٿيڻ وارن واقعن جي ذميوار سنڌ حڪومت کي قرار ڏيندي چيو ته سنڌ حڪومت هٿ وٺي سنڌ اندر خوف ۽ حراس پکيڙڻ جي لاءِ ڀوتارن جي سهولتڪار بڻجي، پولنگ اسٽيشنن تي جهيڙا ڪرايا ويا آهن ته جيئن هو من پسند نتيجا حاصل ڪري سگهن.
هن چيو ته جنهن اليڪشن ۾ حڪومت جو مڪمل ڪنٽرول هجي، انتظاميا ان جي مرضي ۽ منشا تي هلندي هجي ۽ ان جي آشيرواد سان ڀوتارن جي ذريعي پولنگن تي جهيڙا ڪرائي ڪوڙا ٺپا هڻي دٻا ڀريا ويا هجن، ان کي صاف شفاف اليڪشن نٿو چئي سگهجي. ڊاڪٽر قادر مگسي وڌيڪ چيو ته پ پ پ حڪومت وٽ هاڻي وڌيڪ اقتدار ۾ رهڻ جو ڪو اخلاقي جواز ناهي. هنن کي فوري استعيفا ڏيڻ گهرجي. هن چيو ته هيڏي رتوڇاڻ، ڌانڌلي ۽ ڪوڙن ووٽن جي ذريعي کٽي ايندڙ ڪهڙي عوام جي خدمت ڪندا. هن مطالبو ڪيو ته چونڊن دوران ٿيندڙ پرتشدد واقعن جي ذميوارن خلاف قانوني ڪارروائي ڪئي وڃي.
