ميرپوربٺورو: ميرپوربٺورو لڳ جاتي چوڪ روڊ تي ڦورن کان بچائيندي صحافي جو نوجوان ڀا پمپ جي ميٽر سان ٽڪرائجي فوت ٿي ويو. خبر موجب ميرپوربٺورو لڳ جاتي چوڪ روڊ تي بٺورو لڳ ڳوٺ جاني ميمڻ جي رھواسي صحافي نظر ميمڻ جو نوجوان ڀا 32 ورهين جو جاويد پٽ غلام حسين ميمڻ ٻڍي ٽالپر کان بٺورو طرف اچي رھيو هو ته ان دوران نامعلوم موٽرسائيڪل سوار ڦورن کائنس ڦر جي ارادي سان سندس پيڇو ڪيو.
جنهن تي نوجوان ڦورن کان پاڻ کي بچائيندي ٻڍي ٽالپر ويجھو جيلاني پمپ جي ميٽر سان ٽڪرائجي ويو ۽ موقعي تي فوت ٿي ويو. نوجوان جي لاش کي ايمبولينس ذريعي بٺورو اسپتال منتقل ڪيو ويو. جتان ضروري ڪارروائي بعد لاش وارثن حوالي ڪيو ويو. جڏھن ته فوتي نوجوان جو لاش گھر پھچڻ تي ڪھرام مچي ويو. مليل ڄاڻ موجب فوتي نوجوان بٺوري ۾ ڪنھن واپاري وٽ سيلزمين طور نوڪري ڪندو هو.
