چوٽياريون: چوٽياريون ويجهو موٽرسائيڪل ۽ رڪشا ۾ ٽڪر ٿي پيو، پي ۽ ڌي فوت ٿي ويا. عورت سميت 3 ماڻهو زخمي ٿي پيا. خبر موجب چوٽياريون ويجهو زرداري پمپ ڀرسان تيز رفتاري سبب موٽرسائيڪل ۽ رڪشا ڦٽي ۾ آمهون سامهون ٽڪر ٿي پيو، جنهن جي نتيجي ۾ موٽرسائيڪل سوار نوجوان مٺو ڪڇي موقعي تي فوت ٿي ويو، جڏھن ته سندس ڌي چاندني ۽ عورت ڀڳواني سميت پريم ڀاٽ ۽ ٺاڪريو ڀاٽ سخت زخمي ٿي پيا، اطلاع تي چوٽياريون پوليس فوري طور پهچي زخمين کي کڻائي سانگھڙ سول اسپتال پهچايو، جڏھن ته بعد ۾ فوتي نوجوان جي 4 سالن جي معصوم ڌي پڻ زخمن جا سور نه سهندي رستي ۾ فوت ٿي وئي. فوتي نوجوان ۽ سندس معصوم ڌي جا لاش ضروري ڪارروائي بعد وارثن حوالي ڪيا ويا، جيڪي گهر آندا ويا ته ڪهرام مچي ويو. هوڏانهن ٻڌايو پيو وڃي ته فوتي نوجوان اصل اڏيرو لعل اسٽيشن جو رهواسي هو، جيڪو موٽرسائيڪل تي چوٽياريون شھر جي کپرو بائي پاس ڀرسان پيڪن ۾ ويٺل پنهنجي زال کي وٺڻ لا اچي رهيو هو ته معصوم ڌي سميت اجل جو شڪار ٿي ويو.
