عثمان شاھه ھڙي: عثمان شاهه هڙي لڳ ڊاسوڙي ويجهو ٽريڪٽر ٽرالي جو موٽرسائيڪل سان ٽڪر ٿي پيو، جنهن سبب همراهه معصوم نياڻي سميت فوت ٿي ويو. ان سلسلي ۾ ڳوٺ عبدالجبار ٿيٻو روڊ تي ٽريڪٽر ٽرالي ۽ موٽرسائيڪل ۾ ٽڪر ٿي پيو، جنهن جي نتيجي ۾ ميل موري جي ڳوٺ تارو ڀيل جا رهواسي موٽرسائيڪل سوار 30 ورهين جو ڄيٺو ڀيل ۽ سندس 8 ورهين جي ڌي انيتا ڀيل موقعي تي فوت ٿي ويا، جن جا لاش هڪ ڪلاڪ تائين روڊ تي پيل رهيا. حادثي بعد ڊرائيور فرار ٿي ويو. اطلاع تي پيارو لنڊ پوليس پهچي پي ڌي جا لاش کڻائي سول اسپتال ٽنڊوالهيار پهچايا، جتان ضروري ڪارروائي بعد لاش وارثن حوالي ڪيا ويا. پوليس ڪارروائي ڪندي ٽريڪٽر ٽرالي تحويل ۾ ورتي. پي ۽ ڌي جا لاش گهر پهچڻ تي ڪهرام مچي ويو.
