اوٻاوڙو: اوٻاوڙو ڀرسان پيش امام قتل، مسجد مان گوليون لڳل لاش هٿ تفصيل موجب اوٻاوڙو ڀرسان ڳوٺ صابو خان پٺاڻ ۾ 35 ورهين جي پيش امام حافظ شاهد حسين پٺاڻ جو گوليون لڳل لاش هٿ آيو. اهڙو اطلاع فجر مهل نماز پڙهڻ ويل ڳوٺاڻن لاش ڏسي پوليس کي ڏنو، جنهن بعد پوليس واقعي واري هنڌ پهچي مقتول جو لاش کڻاڻي تعلقه اسپتال اوٻاوڙو پھچايو. جتي لاش پوسٽ مارٽم بعد وارثن حوالي ڪيو ويو. جڏهن ته مقتول جو لاش گھر پھچڻ تي ڪھرام مچي ويو. ان موقعي تي مقتول جي وارثن ٻڌايو ته اسين مسڪين آھيون، محنت مزدوري ڪري پنھنجن ٻچن جو گذرسفر ڪندا آھيون، اسان جي ڪنهن سان به دشمني ناهي، ظالمن ظلم ڪندي پٽ کي ناحق قتل ڪري ڇڏيو آھي، اسين ايس ايس پي گھوٽڪي، ڊي آ جي سکر ۽ ٻين کان انصاف جي گهر ڪريون ٿا. هوڏانهن اوٻاوڙو پوليس جو چوڻ آهي ته واقعي جي جاچ شروع ڪري ڇڏي آھي، اصل حقيقت سامھون اچڻ بعد جوابدارن خلاف ڪارروائي ڪئي ويندي. جڏهن ته ڳوٺ ۾ واقع مسجد مان گوليون لڳل لاش هٿ اچڻ وارو معاملو ڳجهارت بڻيل آهي.
