ميرپورخاص: سنڌڙي ٿاڻي جي حد مان مبينا اغوا ٿيل نائين ڪلاس جي شاگردياڻي ڪلثوم پھوڙ کي 12 ڏينهن گذرڻ باوجود پوليس بازياب ڪرائڻ ۾ ناڪام رهي. ڇوڪري جي والد شفيع محمد پھوڙ، سندس گھرواري ۽ سول سوسائٽي جي اڳواڻن منظور ميمڻ، شير محمد سولنگي ۽ تاج بلوچ پريس ڪلب اڳيان مظاهرو ڪري نعريبازي ڪئي. ان موقعي تي شفيع محمد پھوڙ چيو ته 12 ڏينهن اڳ بااثر حسين پھوڙ، سومر ۽ لطيف پھوڙ ھٿيارن جي زور تي نائين ڪلاس جي شاگردياڻي منهنجي نياڻي ڪلثوم پھوڙ کي اغوا ڪيو، ڪيس داخل ڪرائڻ باوجود پوليس رشوت عيوض ڪارروائي نٿي ڪري. سول سوسائٽي جي اڳواڻن چيو ته ٻوڏ متاثر خاندان جي نوجوان نياڻي کي علائقي جا بااثر سرعام اغوا ڪري ويا آهن، پر پوليس وارثن کي انصاف نٿي ڏياري. ڇوڪري جي والدين چتاءُ ڏنو ته جيڪڏهن پوليس ٽن ڏينهن اندر نياڻي کي بازياب نه ڪرايو ته اسان ايس ايس پي آفيس اڳيان پاڻ ساڙينداسين.
