ميرواهه گورچاڻي: ميرواهه گورچاڻي ۾ تعلقي شجاع آباد ڪامپليڪس ڀرسان ميرپورخاص کان مٺي ويندڙ مين روڊ تي سوين ٻوڏ متاثر عورتن احتجاجي مظاهرو ڪري ڌرڻو هڻي روڊ بلاڪ ڪري ڇڏيو ۽ انتظاميا خلاف نعريبازي ڪئي. ان موقعي تي نيلم خاصخيلي چيو ته سنڌ سرڪار پاران بينظير انڪم سپورٽ پروگرام جي مستحق عورتن بابت سروي جاري آهي، جنهن ۾ اسان غريب عورتن جا نالا شامل نه ڪيا ويا آهن، صرف من پسند گهراڻن جا سياسي بنيادن تي سروي دوران نالا شامل ڪري ظلم ڪيو ويو آحي. تعلقي شجاع آباد جي بي آئي ايس پي آفيس جو عملو فارم وٺڻ لا به تيار ناهي، جيڪا زيادتي آهي، اسان جا ٻوڏ سبب گهر ڪري پيا آهن، سڀ ڪجهه ختم ٿي ويو، ان ڪري مجبور ٿي احتجاج ڪري رهيا آهيون. هنن بينظير انڪم سپورٽ پروگرام جي چيئرپرسن کان گهر ڪئي ته عملي خلاف ڪارروائي ڪري حقدار عورتن جا نالا شامل ڪري کين وظيفو ڏنو وڃي.
