اسلام آباد :ماحولياتي تبديلي بابت وفاقي وزير سينيٽر شيري رحمان چيو آهي ته ٻوڏ متاثرن جي مدد لاءِ فوري طور 816 ملين آمريڪي ڊالر جي فراهمي اڻٽر آهي. پاڪستان ٻوڏ متاثرن لاءِ ٻي انساني امداد جي اپيل لاءِ ڪوٺايل تقريب کي خطاب ڪندي چيو ته ڪل 20 ڏهائي 6 ملين ماڻهو هاڻي به امداد جا منتظر آهن. جڏهن ته چئني صوبن جي 34 ضلعن جي ساڍا 9 ملين ماڻهن کي تحفظ فراهم ڪرڻو آهي. اسان کي ٻوڏ متاثرن کي تحفظ، کاڌي پيتي جون شيون فراهم ڪرڻ سميت پناهه ڏيڻ، کين ٻيهر آباد ڪرڻو آهي. هن چيو ته اسان 24 ڪلاڪ ڪم ڪري رهيا آهيون ۽ ان حوالي سان وفاق ۽ صوبن ۾ مڪمل هم آهنگي آهي. اٽڪل 1700 ماڻهو پنهنجون حياتيون وڃائي ويٺا ۽ 13000 جي لڳ ڀڳ زخمي ٿيا. 7 ڏهائي 9 ملين هاڻي به بي گهر آهن، متاثر 33 ملين مان اٽڪل 70 سيڪڙو عورتون ۽ ٻارڙا آهن. وفاقي وزير عالمي برادري کي ماحولياتي بحران کان آگاهه ڪندي چيو ته 46000 مربع ڪلوميٽر هاڻي به پاڻي ۾ ٻڏل آهي. متاثرن جو انگ سوئٽرزليند ۽ پرتگال جي ڪل آبادي کان ڪافي گهڻو آهي. متاثر گهراڻا هاڻي به صدمي ۾ آهن، جيڪي ڏينهن رات کليل آسمان هيٺ گذارڻ تي مجبور آهن. هن چيو ته توانائي جي عالمي کوٽ سبب اسان جا درآمدي بل سخت متاثر ٿين ٿا، قرضن جي ادائيگين سان گڏ ۽ هارين ۽ ٻيا متاثر شعبا پهريان کان ئي نقصان ۽ نقصان جي تلافي جو مطالبو ڪري رهيا آهن. ٻوڏ متاثرن جي مدد ۽ وسيلن کي متحرڪ ڪرڻ لاءِ اقتصادي نظام کي وڏو ڌڪ لڳو آهي. هن چيو ته اسان 20 سالن تائين جاري رهندڙ عسڪري جنگ ۾ 80000 ماڻهن جي قرباني ڏني آهي. جڏهن ته اسان پنهنجي در تي ٻوڏ واري صورتحال کي منهن ڏيڻ لاءِ قدمن ۽ وسيلن کي سخت کوٽ کي منهن ڏئي رهيا آهيون. ڊگهي فوجي جنگ تي روزانو 30 ملين آمريڪي ڊالر خرچ ٿيا. رڳو ٽن ڏينهن جي هنگامي فنڊنگ سان لکين ماڻهن جي مدد ممڪن ٿي سگهندي. پاڪستان حڪومت غريبن کي بنا دير روڪ امداد تائين پهچ حاصل ٿئي، مڪمل شفافيت سان اسان جي بي آئي ايس پي پروگرام جي ذريعي متاثر آبادي جي 2 ڏهائي 4 ملين ماڻهن تائين 261 ملين آمريڪي ڊالر کان وڌيڪ رقم ورهائي وئي آهي. شيري رحمان گڏيل قومن جي آرسي جولين هارنيس، او سي ايڇ سي جي سربراهه رميش راجا سنگهه، مارٽن گريفٿس، انڊر سيڪريٽري جنرل انساني همدردي سميت ڊاڪٽر ٽيڊروس ايڊهانوم گيبريس، ڊائريڪٽر جنرل ڊبليو ايڇ او جي قيادت ۽ پاڪستان ۾ صحت جي خطرن تي اعليٰ سطحي ڌيان ڏيڻ تي شڪريو ادا ڪيو.
