خانپورمهر: خانپورمهر ويجهو ٻن ڌرين ۾ پراڻي تڪرار تان هڪ ڄڻو قتل خبر موجب خانپورمهر ٿاڻي جي حد سهانجڙو بوزدار واري علائقي جي ڳوٺ ڪيهر بوزدار ۾ پراڻي تڪرار تان هٿياربندن گوليون هڻي 40 ورهين جي سيندل بوزدار کي قتل ڪري ڇڏيو. اطلاع ملڻ تي پوليس واقعي واري هنڌ پهچي لاش تحويل ۾ وٺي خانپورمهر جي شيخ همدان بن محمد اسپتال کڻائي آئي. جتي مارجي ويل شخص جي ڀاءُ شاهنواز بوزدار ميڊيا کي ٻڌايو ته اسان جي پراڻي دشمني هلندڙ آهي، منهنجو ڀاءُ شهر کان واپس موٽرسائيڪل تي گهر وڃي رهيو ته رستي ۾ جوابدار گھنور بوزدار، جيئل، نواز، بچو ۽ ٻين اڳ وٺي کيس گوليون هڻي قتل ڪيو آهي. پوليس موجب واقعو پراڻي تڪرار تان پيش آيو آهي، وڌيڪ جاچ ڪئي پئي وڃي. هوڏانهن مارجي ويل جو لاش پوسٽ مارٽم بعد وارثن حوالي ڪيو ويو. آخري اطلاعن تائين واقعي جو ڪيس داخل نه ٿي سگهيو ۽ نه ئي ڪا گرفتاري عمل ۾ اچي سگهي.
