ڏهرڪي: ڏهرڪي ويجهو ماهي واهه وٽ ڏينهن ڏٺي جو موٽرسائيڪل سوار نامعلوم هٿياربندن پاران ميرپور ماٿيلو واسي سيٺ ڪپيل ڪمار کي روڪي هٿيارن جي زور تي يرغمال بڻائي 2 لک 40 هزار روپيا روڪ، موبائل فون، ليپ ٽاپ ۽ ٻيو قيمتي سامان ڦر ڪيو ۽ مزاحمت تي هٿياربندن اشوڪ ڪمار کي ڄنگهه ۾ گولي هڻي سخت زخمي ڪري ڇڏيو، جنهن کي ڏهرڪي جي اسپتال ۾ داخل ڪيو ويو. ان موقعي تي زخمي اشوڪ ڪمار ٻڌايو ته مان ڪپيل ڪمار سان گڏجي ميرپورماٿيلو کان ڏهرڪي ڪاروبار جي سلسلي ۾ اچي رهيو هئس ته ماهي واهه وٽ موٽر سائيڪل تي سوار هٿياربندن ڦر ڪئي ۽ مزاحمت ڪرڻ تي گولي هڻي زخمي ڪيو. ٻي پاسي واپاري کي زخمي ڪرڻ جو ٻڌي وارث ۽ شهري وڏي تعداد ۾ اسپتال پهچي ويا. واپاري چيو ته بدامني چوٽ چڙهي وئي آهي، هتي ڪير به محفوظ ناهي. هنن ايس ايس پي گهوٽڪي کان مطالبو ڪيو ته ڦر واقعي جو نوٽيس وٺي جوبدار گرفتار ڪيا وڃن.
