راڌڻ: راڌڻ لڳ ڳوٺ يعقوب پنھور ۾ مختلف برادرين طرفان پ پ پ کي ڇڏي لياقت علي جتوئي تي اعتماد جو اظھار ڪندي پي ٽي آ ۾ شموليت جو اعلان ڪيو ويو آهي. ان موقعي تي عوامي ميڙاڪي کي خطاب ڪندي اڳوڻي وڏي وزير ۽ پي ٽي آ اڳواڻ لياقت جتوئي پ پ تي سخت تنقيد ڪندي چيو ته منهنجي پ پ سان ڪابه ذاتي دشمني ناھي پر ھنن وڏو ظلم ڪيو آهي.
ھنن سنڌ جي ھر شي تباھه ۽ برباد ڪري ڇڏي آهي، ھٿ سان سڄي سنڌ ٻوڙائي مال کاڌو آهي، کاٽين ۽ بندن جا اربين رپيا کاڌا آهن جنهن سبب ٻوڏ آئي ۽ بند ٽٽي پيا ۽ سنڌ تباھه ٿي پر مان 16 سال ھنن سان مزاحمت ۽ محاذ آرائي ڪئي آهي ته غريب مظلومن جو مال نه کائو، يتيم غريب مظلوم مسڪينن جا پيسا نه کائٔو، صحيح طريقي سان روڊ رستا اسڪول اسپتالون ڏيو، ھنن ھر شئ ھڙپ ڪئي آهي.
