عمرڪوٽ: عمرڪوٽ تعلقي جا 20 کان وڌيڪ لنڪ روڊ راجارستي کان ولهيٽ، بودرفارم کان ڪرنا موري، ڍورونارو کان انور پلي، بلاول هاليپوٽو، ٿرواهھ موري کان ٻيرڇن راجارستي کان بودرفارم ۽ خانصاحب جي ڳوٺ کان ڪرناموري سميت مختلف لنڪ روڊ ڳچ عرصو مرمت نه ٿيڻ سبب هنڌان هنڌان اکڙي تباھه ٿي ويا آهن، جنهن سبب حادثا ۽ ڦرون معمول بڻجي ويون آهن. روڊس کاتي جي عملدارن جي نااهلي سبب روڊن ۾ پيل کڏن جي مرمت ڪرائڻ بدران مٽي جي ڀرائي ڪرائي جان ڇڏائي وئي آهي، جنهن سبب مٽي ۽ دز سبب علائقي واسي مختلف بيمارين ۾ مبتلا ٿي ويا آهن ۽ روڊن جي ٻنهي پاسن کان گهاٽا وڻ وري ويا آهن. ان سلسلي ۾ سماجي اڳواڻن عبدالله بنگلاڻي، وڪيل امرچند ڀيل، ذاڪر بنگلاڻي، جانڻ سنڌي ۽ ٻين چيو ته عمرڪوٽ تعلقي جي اڪثر لنڪ روڊن ۽ مورين جي حالت انتهائي خراب آهي، جن جي مرمت لا آيل پئسا روڊس کاتي جي ڪامورن ملي ڀڳت ڪري هڙپ ڪيا آهن، روڊن ٺهڻ کان وٺي اڄ ڏينهن تائين هر حڪومتي دور ۾ مرمت واري ڪم کي نظرانداز ڪيو ويو آهي، جنهن سبب اسان آزار ۾ آهيون، روڊن ۾ وڏا کڏا پئجي ويا آهن ۽ روڊ اکڙي تباهه ٿي ويا آهن، پر چونڊيل نمائندا توڙي ضلعي انتظاميا نوٽيس وٺڻ لا تيار ناهي. هنن چونڊيل نمائندن کان مطالبو ڪيو ته ڄاڻايل مين روڊ سميت سمورن لنڪ روڊن جي جلد مرمت ڪرائي عوام کي پريشاني کان بچايو وڃي.
