شرم الشيخ ڪانفرنس،موسمياتي تبديلي جي متاثر ملڪن کي معاوضو ڏيڻ جي تجويز

مصر جي وارياسي تفريحي ماڳ شرم الشيخ ۾ گڏيل قومن جي 27 هين موسمياتي تبديلي ڪانفرنس شروع ٿي وئي آهي، ڪوپ- 27 جي افتتاحي تقريب ۾ مختلف ملڪن جا سربراهه ۽ نمائندا موسمياتي تبديلين کي منهن ڏيڻ جي لائحه عمل تي عملدرآمد جو جائزو وٺڻ لا شرڪت ڪري رهيا آهن. پرڏيهي ميڊيا جي رپورٽ موجب 27 هين موسمياتي تبديلي ڪانفرنس ۾ پاڪستان جهڙن موسمياتي تبديلين سبب متاثر ٿيل ڪمزور ملڪن لا معاوضي جي تجويز تي غور لا ان کي ايجنڊا ۾ شامل ڪرڻ تي اتفاق ٿي ويو آهي. پاڪستان مان وزيراعظم شهباز شريف سربراهي ڪانفرنس ۾ شرڪت لا مصر پهچي چڪو آهي، جڏهن ته پرڏيهي وزير بلاول ڀٽو زرداري ۽ ڪابينا ميمبرن سميت اعليٰ عملدار به وزيراعظم سان گڏ شريڪ آهن. پرڏيهي ميڊيا مطابق شرم الشيخ ڪانفرنس ۾ يوڪرين جنگ، عالمي مهانگائي، خوراڪ سميت مختلف بحرانن ۽ موسمياتي تبديلين کي منهن ڏيڻ لا لائحه عمل تي ڳالهه ٻولهه ڪئي وئي. شروعاتي ڳالهه ٻولهه بعد ان ڳالهه تي اتفاق ڪيو ويو ته ڪمزور ملڪن کي موسمياتي تبديلين سبب ٿيندڙ نقصان ۽ تباهي تي ازالي طور معاوضو ادا ڪيو وڃي، ان کان اڳ ماضي ۾ هي مسئلو ڪيترن ئي ورهين کان ڳالهه ٻولهه جو حصو نه بڻجي سگهيو هو.