دادو: دادو ڀرسان ڪپڙن کان آجو نوجوان جو لاش ڦڪا شاخ مان هٿ، اطلاع تي خداآباد پوليس واقعي واري هنڌ پهچي لاش اسپتال منتقل ڪيو، وارث نه ٿيڻ تي لاش ايڌي رضاڪارن حوالي. خبر موجب دادو ڀرسان خداآباد ٿاڻي جي حد ڦڪا شاخ مان نامعلوم شخص جو ڪپڙن کان آجو لاش هٿ اچڻ واري اطلاع تي خداآباد پوليس واقعي واري هنڌ پهچي لاش تحويل ۾ وٺي سول اسپتال دادو منتقل ڪيو.
خدا آباد پوليس موجب لاش پاڻي مان لڙهي ڦڪا شاخ مان ڳوٺ حسين بخش لنڊ جي موري ۾ ڦاٿو، جيڪو ڪڍرائي اسپتال منتقل ڪيو آهي، لاش جي سڃاڻپ نه ٿي سگهي آهي. جنهن سبب لاوارث شخص جي لاش کي دفنائڻ لاءِ ايڌي رضاڪارن حوالي ڪيو ويو آهي، پوليس موجب لاش هڪ هفتو پراڻو آهي، وڌيڪ جاچ ڪري رهيا آهيون، جڏهن ته ايڌي رضاڪارن پاران لاش جو غسل ڪرڻ بعد ايڌي قبرستان ۾ مٽي ماءُ حوالي ڪيو ويو آهي.
