ڪراچي: ڪراچي جي سپر هاءِ وي تي قائم نجي هائوسنگ سوسائٽي ۾ ڪار اونهي کاهي ۾ ڪرڻ سبب عورتن ۽ ٻارڙن سميت 5 ماڻهو فوت ٿي ويا آهن. پوليس مطابق نجي هائوسنگ سوسائٽي ۾ ڪنهن ڪم جي ڪري ڪيترائي فوٽ اونهي کوٽائي ڪئي وئي هئي ۽ ان ۾ پاڻي ڀرجي ويو هو ته ان دوران اتان لنگهندڙ ڪار ان ۾ وڃي ڪري. حادثي ۾ ڪار ۾ سوار 45 ورهين جو احمر شريف، سندس زال 40 ورهين جي صائمه احمر، پٽ 14 ورهين جو عبدالله شريف، 48 ورهين جي فهميده نعيم ۽ 14 ورهين جو حماد فوت ٿي ويا آهن.
واقعي کانپوءِ ڪار کي ڪرين جي مدد سان کاهي مان ٻاهر ڪڍيو ويو. ريسڪيو ذريعن مطابق هڪ زخمي ٻارڙي هن وقت لياقت نيشنل اسپتال ۾ علاج هيٺ آهي، جنهن کي طبي امداد ڏني پئي وڃي. جڏهن ته حادثي جي شڪار خاندان جي وارثن مطابق متاثر خاندان نجي هائوسنگ سوسائٽي جو رهواسي هو، جيڪو هڪ سال اڳ ئي اتي آباد ٿيو هو، هن کان اڳ متاثر خاندان شاهه فيصل ڪالوني ۾ رهائش ڪري رهيو هو، گهرڀاتين ان حوالي سان وڌيڪ ٻڌايو ته فوتي خاندان جو سربراهه احمر هڪ سول انجينئر هو.
