تحريڪ انصاف پنجاب اسيمبلي ۾ اعتماد جي ووٽ لا نه پهتل پنهنجي 5 ميمبرن کي نااهل ڪرائڻ لا اليڪشن ڪميشن ۾ ريفرنس موڪلڻ جو اعلان ڪيو آهي. اڳوڻي وزيراعظم عمران خان جي سوشل ميڊيا آپريشنز فوڪل پرسن اظهر مشواني چيو آهي ته چوڌري پرويز الاهي لا اعتماد جي ووٽ جي موقعي تي خرم لغاري، مومنا وحيد، فيصل فاروق چيما، دوست مزاري ۽ چوڌري مسعود اسيمبلي ۾ نه آيا، پنجن ئي ميمبرن جي نااهلي جو ريفرنس اليڪشن ڪميشن کي موڪليو ويندو. ٽوئيٽر تي پنهنجي پيغام ۾ اظهر مشواني چيو ته پنجاب اسيمبلي ۾ تحريڪ انصاف ميمبرن جو انگ 180 آهي، جن مان 5 ڄڻن کي ڪڍي گذريل رات 175 ميمبر موجود هئا، مسلم ليگ (ق) جي 10 ۽ هڪ آزاد اميدوار سان گڏ 186 ووٽن ذريعي پرويز الاهي اعتماد جو ووٽ وٺڻ ۾ ڪامياب ٿيو.
