ڪراچي: ڪراچي جي نيو ٽائون ۽ سرجاني ٽائون ۾ هٿياربندن ڦر دوران مزاحمت تي پوليس اهلڪار سميت 3 ڄڻن کي فائرنگ ڪري زخمي ڪري ڇڏيو. تفصيل موجب ضلعي اوڀر جي نيو ٽائون ٿاڻي ڀرسان موٽرسائيڪل سوار هٿياربندن ڦر دوران مزاحمت ڪرڻ تي 55 ورهين جي سب انسپيڪٽر سيد طاهر شاهه کي ٽنگ ۾ گوليون هڻي زخمي ڪري ڇڏيو، جنهن کي فوري طبي امداد لاءِ عباسي شهيد اسپتال نيو ويو.
هوڏانهن ضلعي اولھه جي علائقي سرجاني ٽائون ڀينس ڪالوني موري وٽ موٽرسائيڪل سوار هٿياربندن 28 ورهين جي امير علي کي ڦر دوران مزاحمت تي زخمي ڪيو. سرجاني ٽائون جي ڳڙهي جي عباس ڳوٺ وٽ ڦر دوران مزاحمت تي عمران نالي 35 ورهين جو نوجوان پڻ زخمي ٿي پيو. جڏهن ته ناظم آباد بلاڪ ايڇ 3 مبين آٽو پارٽس وٽ جوابدار 15 سيڪنڊن ۾ موٽرسائيڪل ڦر ڪري فرار ٿي ويا.واقعي جي سي سي ٽي وي فوٽيج ايڪسپريس نيوز کي ملي وئي.
