ڪڪڙ: خانپور جوڻيجو واسي سئي سدرن گئس ڪمپني ڪراچي جي اغوا ٿيل ميڊيڪل آفيسر جو لاش سهراب ڳوٺ واري علائقي مان ٽن ڏينهن بعد هٿ آيو. ڪڪڙ جي ڳوٺ خانپور جوڻيجو واسي سئي سدرن گئس ڪمپني ڪراچي جو ميڊيڪل آفيسر رحم علي شاهه کي 3 ڏينهن اڳ 6 جولاءِ تي ڪراچي جي علائقي نرسري مان نامعلوم جوابدار اغوا ڪري ويا هئا، جنهن جو لاش گذريل ڏينهن سهراب ڳوٺ واري علائقي مان مليو. سهراب ڳوٺ پوليس موقعي تان لاش پنهنجي تحويل ۾ وٺي ضروري ڪاروائي لاءِ سهراب ڳوٺ جي سرد خاني ۾ رکي وارثن پ پ اڳواڻ سيد قمر زمان شاهه کي اطلاع ڏنو. وارث لاش کڻائڻ لاءِ سهراب ڳوٺ روانا ٿي ويا. رابطي ڪرڻ تي پ پ اڳواڻ قمر زمان شاهه ٻڌايو ته ظالمن ظلم ڪيو آھي، منهنجي وڏي ڀاءُ کي اغوا ڪري قتل ڪيو ويو، ڀاءُ جي اغوا جي رپورٽ داخل ڪرائي هئي، وڌيڪ ميڊيڪل رپورٽ اچڻ بعد ئي سندس موت جي خبر پوندي. هوڏانهن ميڊيڪل آفيسر رحم علي شاهه جو تڏو خانپور جوڻيجو ۾ مرحوم انجنيئر احسان شاهه جي رهائشگاهه تي وڇايو ويو.
