نيوزيلينڊ جي ڪرڪيٽ ٽيم پاڪستان هٿان لاڳيتو ٻھ ٽي 20 ميچ هارائڻ بعد ڌماڪيدار واپسي ڪندي پاڪستان کي سخت مقابلي بعد رڳو 4 رنسن تان شڪست ڏئي ڇڏي آهي. ميڊيا مطابق لاهور ۾ کيڏيل ٽيئن ٽي 20 ۾ نيوزيلينڊ جي ٽيم پاڪستان کي 164 رنسن جو هدف ڏنو،
جنهن جي پويان پاڪستاني ٽيم 159 رنسن تي آئوٽ ٿي وئي آهي، جنهن بعد 5 ميچن واري سيريز ۾ پاڪستان 2 ۽ نيوزيلينڊ هڪ ميچ کٽي آهي. رپورٽ ۾ چيو ويو آهي تھ، نيوزيلينڊ جي بيٽرن 5 وڪيٽن تي 163 رنسون ٺاهيون، جنهن ۾ ڪپتان ٽام ليٿم 64 رنسن جي شاندار اننگز کيڏي، ڊيرل مچل 33 ۽ ول ينگ 17 رنسن سان نمايان رهيا، پاڪستاني بالرن شاهين آفريدي ۽ حارث رئوف 2،2 وڪيٽون ورتيون. پاڪستان جي افتخار احمد 6 ڇڪن ۽ 3 چوڪن سان 60 رنسن جي جارحاڻي اننگز کيڏندي ٽيم کي ڪاميابي ويجهو آڻي بيهاريو،
جنهن ۾ فهيم اشرف 27 رنسن سان سندس ساٿ ڏنو، پر ٻنهي آئوٽ ٿيڻ بعد باقي بيٽر پچ تي بيهي نھ سگهيا ۽ ٽيم 159 رنسن تي آئوٽ ٿي شڪست کائي وئي، ڪيوي بالرن جيمز نشام 3، ايڊم مائلني ۽ راچن رويندر 2،2 وڪيٽون ورتيون هيون.
