ڪراچي :سنڌ جي آبپاشي کاتي واري وزير ڄام خان شوري سنڌ صوبي ۾ شديد پاڻي بحران تي پنهنجي بيان ۾ چيو آهي ته سنڌ صوبي کي هن وقت شديد پاڻي جي بحران کي منهن ڏيڻو پئجي رهيو آهي ۽ سنڌ کي ٿري ٽيئر فارمولي جي ڪري پنهنجي حصي جو گهٽ پاڻي فراهم ڪيو پيو وڃي. جڏهن ته پاڻي معاهدي 1991 تحت اپريل ۾ سنڌ کي خريف سيزن جي لاءِ 2 ڏهائي 408 ايم اي ايف پاڻي فراهم ڪرڻو آهي پر 1 ڏهائي 388 ايم اي ايف پاڻي ڏنو ويو آهي. صوبائي وزير ڄام خان شوري جو چوڻ هو ته پنجاب صوبي کي حصي جو پاڻي 4 ڏهائي 116 بڻجي ٿو ۽ هن کي ڪل 2 ڏهائي 719 ايم اي ايف پاڻي فراهم ڪيو ويو ۽ ارسا موجب صوبن کي هن وقت منفي 36 سيڪڙو پاڻي جي کوٽ کي منهن ڏيڻو پوي ٿو. ان حساب سان سنڌ صوبي کي 1 ڏهائي 542 ايم اي ايف پاڻي مهيا ڪرڻو آهي پر ارسا 1 ڏهائي 388 ايم اي ايف پاڻي ڏئي رهيو آهي. هن پنهنجي بيان ۾ وڌيڪ چيو ته سنڌ کي پنهنجي حصي کان گهٽ پاڻي مهيا ڪرڻ سان صوبي اندر شديد پاڻي بحران پيدا ٿيو آهي. سنڌ صوبي کي فوري طور تي پنهنجي حصي جو پاڻي مهيا ڪري محرومي کي ختم ڪيو وڃي.
