ڊگھڙي: ڊگهڙي ڀرسان هٿياربندن استاد تي تشدد ڪري گهر کي باهه ڏئي ڇڏي. رپورٽ موجب ڊگھڙي ٿاڻي جي حد ڳوٺ ديھه اي 164 جي رهواسي استاد مانجهي ميگهواڙ پنهنجي ڀائرن ۽ برادري جي ماڻھن خوشحال ميگهواڙ، مگهن ميگهواڙ، والجي ميگهواڙ، چيتن ميگهواڙ ۽ ٻين سان گڏ ڳوٺ ۾ صحافين اڳيان احتجاج ڪيو. هن چيو ته پاڙيسري عبدالجبار، شھباز ۽ زمان عرف جانو پنهنجي چئن ناملعلوم هٿياربند ساٿين سان گڏ گذريل رات دير سان منهنجي گهر تي حملو ڪري داخل ٿي باھه ڏني ۽ منهنجي مٿان تشدد ڪيو، اطلاع تي پوليس پهتي، پوليس جي موجودگي ۾ جوابدار فائرنگ ڪندا فرار ٿي ويا، واقعي واري جا تان هٿ آيل گولين جا خول پوليس حوالي ڪيا. مانجهي ميگهواڙ چيو ته مون ٿاڻي تي جوابدارن کان تحفظ ڏيارڻ جي درخواست ڏني، پر پوليس تحفظ ڏيڻ ۾ ناڪام وئي آهي، جوابدارن جي ڪوشش آهي ته ڳوٺ مان لڏائي پلاٽ تي قبضو ڪري وٺن، ان ڪري تنگ ڪري رها آهن. هن ڊي آئي جي ميرپورخاص ۽ ايس ايس پي ميرپورخاص کان مطالبو ڪيو ته ڄاڻايل ڌرين خلاف قانوني ڪارروائي ڪري تحفظ ۽ انصاف فراهم ڪيو وڃي. هوڏانهن پوليس مانجهي ميگهواڙ جي فرياد تي شهباز علي جٽ، زمان جٽ، محمد عالم جٽ ۽ چار نامعلوم جوابدارن خلاف ڪيس داخل ڪري ڇڏيو، آخري اطلاع تائين ڪابه گرفتاري عمل ۾ نه اچي سگهي هئي.
