ننگرپارڪر: ننگرپارڪر تعلقي جي مختلف ڳوٺن ۾ رولو ڪتن جو آزار وڌي ويو. گذريل ڏينھن ڳوٺ گڊڙو چارڻ ۾ 8 سالن جو معصوم نينگر ارجڻ پٽ شھديو ڪولھي جھنگ ۾ مال چاري رھيو ھو ته مٿس رولو ڪتن حملو ڪري ڏنو، نينگر رڙيون ڪري ھيٺ ڪري پيو ۽ بيھوش ٿي ويو، نينگر جي رڙين تي مائٽ پھچي ويا ۽ کيس بيھوشي واري حالت ۾ ننگرپارڪر اسپتال آندو ويو، ڊاڪٽرن زخمي ٻارڙي کي مٺي ريفر ڪيو، جتي نينگر فوت ٿي ويو. ڊاڪٽرن ٻڌايو ته نينگر ڪتن جي ڊپ سبب ڪوما ۾ ھليو ويو ۽ فوت ٿي ويو. ٻار جي والد شھديو ٻڌايو ته منھنجو معصوم پٽ ڪتن ماريو. ٻئي طرف ڳوٺاڻن انور ڪنڀار، عبدالرحيم ۽ ٻين ٻڌايو ته رولو ڪتن جو آزار وڌي ويو آھي، ڪتا روز مال، ھرڻ، سھيڙ ۽ ٻيا جانور ماري کائين ٿا، پر يوسي سيڪريٽري ھر مھيني ايندڙ بجيٽ کائي پيو. هنن گهر ڪئي ته جلد ڪتا مار مهم هلائي وڃي.
