نوشهروفيروز: نوشهروفيروز ۾ ٻوڏ متاثرن جي واهر نه ٿيڻ ۽ فنڊن ۾ گهوٻين خلاف سنڌ يوٿ ايڪشن ڪاميٽي جي سڏ تي ڊي سي آفيس آڏو علامتي بک هڙتال، سنڌ يوٿ ايڪشن ڪاميٽي جي چيئرپرسن سنڌو نواز گهانگهرو، حمز علي چانڊيو، منير وسطڙو ۽ ٻين جي اڳواڻي ۾ ڊي سي آفيس جي مک گيٽ آڏو ڪيترائي ڪلاڪ علامتي بک هڙتال ڪئي وئي. ان موقعي تي سنڌو نواز گهانگهرو خطاب ڪندي چيو ته نوشهروفيروز ۾ هزارين متاثر بکن ۾ پاهه، بدحالي ۽ مسئلن جو شڪار آهن، ضلعي ۾ اڃا تائين ٻوڏ ۽ برسات جو پاڻي بيٺل آهي، انتظاميا صرف حڪومتي ڌر جي خاص ماڻهن جي زمينن مان پاڻي ڪڍرايو آهي، متاثرن جي ڪا واهر ناهي ٿي، جڏهن ته متاثرن لاءِ آيل فنڊن ۾ ڪروڙين رپين جي ڪرپشن ڪئي وئي آهي، ڊي سي تاشقين عالم عوام جو نمائندو ٿيڻ بدران پ پ اڳواڻن جو خاص ماڻهو بڻجي ويو آهي. هن وڌيڪ چيو ته ٻوڏ متاثرن جي واهر ڪري ضلعي جي ماڻهن جا بنيادي مسئلا حل ڪيا وڃن.
