قبوسعيد خان ۾ ٻوڏ متاثرن واھر نه ٿيڻ خلاف بس اسٽينڊ تي احتجاجي مظاھرو ڪيو. ان موقعي تي اڳواڻن امتياز مگسي، ڪامريڊ رسول بخش بروھي، جانب کوسو ۽ ٻين دانھيندي ٻڌايو ته ٻوڏ کي ٽي مھينا گذري ويا پر سنڌ سرڪار ٻوڏ متاثرن جي امداد لا موڪليل راشن، ٽينٽ ٻيو سامان اسسٽنٽ ڪمشنر زين العابدين مگسي من پسند ماڻهن ۽ وڏيرن حوالي ۽ ايجنٽ ذريعي وڪرو ڪري ٿو جيڪا وڏي ناجائزي آھي. ھنن چيو ته اي سي ٻوڏ متاثرن سان ملڻ لا تيار ناھي نه وري ڪنھن کي رليف پھچائي ٿو صرف وڏيرن ۽ سفارشي ماڻھن جي ونگار پيو وھي. ھنن چيو ته ٻوڏ سبب گھر ڊھي پٽ ٿي ويا ۽ ھينئر سيارو اچي ويو آهي، اسان کي ٽينٽ، ڪمبل ۽ راشن جي سخت ضرورت آھي. ھنن وڏي وزير ۽ ڪمشنر لاڙڪاڻي کان مطالبو ڪيو ته اسسٽنٽ ڪمشنر کي فوري طور تي ھٽائي ٻوڏ متاثرن کي رليف ڏئي بک ۽ بدحالي کان بچايو وڃي.
