چمبڙ: چمبڙ ويجھو چمبڙ-ٽنڊو الهيار روڊ اڇي مسجد ڀرسان ڪمند سان ڀريل ڪلٽي ٿيل ٽرڪ ڀرسان بسترو لڳائي ستل ٽرڪ ڊرائيور ۽ پورهيت مٿان ٽرڪ چڙهي وئي، ڪلٽي ٿيل ٽرڪ جو چمبڙ واسي 45 ورھين جو ٻن معصوم نياڻين جو پي معشوق علي خاصخيلي ٿڏي تي فوت ٿي ويو، جڏھن ته پورھيت چندر ڪولھي سخت زخمي ٿي پيو. اطلاع تي بي سيڪشن پوليس واقعي واري ھنڌ پھچي لاش ۽ زخمي کي کڻائي سول اسپتال منتقل ڪيو، جتان زخمي کي گڻتي جوڳي حالت ۾ حيدرآباد اسپتال منتقل ڪيو ويو. پوليس موجب ڄاڻايل ھنڌ تي ٽرڪ اڳ ۾ ڪلٽي ٿيل ھئي. جتي ٽرڪ ڊرائيور ۽ ڪمند جي ڪٽائي ڪندڙ پورھيت ٽرڪ ڀرسان بسترو لڳائي ستل ھئا، ڪلٽي ٿيل ڪمند کي لوڊ ڪرڻ لاءِ آيل خالي ٽرڪ ستل ٽرڪ ڊرائيور ۽ پورهيت مٿان اوچتو چڙهي وئي، پوليس ڊرائيور کي گرفتار ڪري ٽرڪ تحويل ۾ وٺي ڇڏي. فوتي ٽرڪ ڊرائيور جو لاش چمبڙ شھر ۾ سندس گھر پھچڻ تي ڪھرام مچي ويو.
