اسلام آباد :نگران وزيراعظم انوار الحق ڪاڪڙ چيو آهي ته اسان وٽ وقت محدود آهي، اسان جو ڪم چونڊ عمل ۾ مدد ڪرڻ آهي، ان کان وڌيڪ مينڊيٽ ناهي. ڪجهه ماڻهو سمجهن ٿا ته آئون ان اختيار کان وڌيڪ ڳالهائي رهيو آهيان، انهن کي ياد ڏياريان ٿو ته نگران وزيراعظم کان علاوه آئون شهري به ته آهيان. هڪ شهري جي حيثيت ۾ مون کي پنهنجي راءِ جو اظهار ڪرڻ کان ڪير به نه روڪي. بٹٽگرام ۾ چيئر لفٽ آپريشن ۾ حصو وٺندڙ سپاهين ۽ مقامي ماڻهن جي اعزاز ۾ سندون ورهائڻ جي تقريب وزيراعظم هائوس ۾ ٿي. نگران وزيراعظم انوارالحق ڪاڪڙ ريسڪيو ٽيم کي انعام ۽ تعريفي سرٽيفڪيٽ ڏنا. ان موقعي تي ڳالهائيندي انوار الحق ڪاڪڙ چيو ته چيئر لفٽ واقعي تي لکين ماڻهو پريشان هئا، اسان انهن ٻارن کي بچائي ملڪ جو مستقبل بچايو، منهنجي پٽ جو چهرو بار بار منهنجي سامهون اچي رهيو هو، مان سوچي رهيو هوس ته جيڪڏهن منهنجو پٽ صحيح نه هجي ها ته منهنجو ڇا ٿئي ها. انتهائي احتياط سان بچاءُ وارو منصوبو ٺاهيو ويو ۽ سڀني کي محفوظ طريقي سان ٻاهر ڪڍيو ويو، جيڪڏهن ڪو جھول يا شارٽ فال ٿئي ها ته وڏو نقصان ٿئي ها. هن چيو ته گذريل ڏينهن وزيرستان ۾ پاڪ فوج جي جوانن جي شهادت جو واقعو پيش آيو، جيڪي عنصر سمجهن ٿا ته طاقت ۽ تلوار سان اسان جي زندگي، ڳالهائڻ جو انداز، اسان جي زندگي جو انداز بدلجي ويندو، اهي غلط فهمي ختم ڪن. ائين ڪڏهن به نه ٿيندو، هي اسان جو گهر آهي ۽ اسان ڪٿي به وڃڻ وارا ناهيون، گهر جو نظام طاقتور ۽ باصلاحيت ماڻهن جو آهي.
