40 سال اڳ ڀارت مان پاڪستان اغوا ٿيل آيل عورت کي سوشل ميڊيا پنهنجي وڇڙيل خاندان سان ملائي ڇڏيو. سوشل ميڊيا تي گذريل ڏينهن هڪ وڊيو وائرل ٿي، جنهن ۾ هڪ عورت ڀارت ۾ موجود پنهنجي مائٽن جا نشان به ٻڌايا ۽ پنهنجي باري ۾ ٻڌايو. اها وڊيو ايتري وائرل ٿي جو عورت جي ڀاءُ ان کي سوشل ميڊيا تي ڏٺو ۽ ساڻس رابطو ڪيو. پرڏيهي خابرو اداري موجب مُني نالي عورت ڀارتي رياست اتر پرديش جي هڪ ڳوٺ جي رهواسڻ هئي، جنهن کي 1981ع ۾ 16 سالن جي ڄمار ۾ هڪ مائٽ دهلي وٺي وڃي ڪري هڪ شخص کي وڪرو ڪري ڇڏيو هو ۽ اهو شخص کيس ڪراچي وٺي آيو. عورت موجب جنهن کيس ڪراچي ۾ اغوا ڪندڙن کان بچايو ان جو نالو سجاد آهي، جيڪو هاڻي سندس مڙس آهي، عورت جو چوڻ آهي ته مان پنهنجو نالو بدلائي بشريٰ رکيو ۽ مون کي 4 ٻار آهن، جن سان مان خوشيءَ سان زندگي گذاري رهي آهيان.
