18 ڏينهن اڳ ڪشمور جي ملڪ پاڙي مان اغوا ٿيل معصوم ٻارڙو شيراز ملڪ بازياب ٿي ويو. ڪشمور پوليس پاران ڪشمور ويجھو گيهلپور جي ڪچي واري علائقي مان بازياب ڪرائڻ جي دعوا ڪئي. بازياب ٿيل معصوم ٻارڙو شيراز ملڪ جي گھر پچهڻ تي گهر ڀاتين ۾ خوشي جي لهر ڇانئجي وئي. جڏهن ته ٻارڙي جي جدائي ۾ بيحال ٿيل ٻارڙي جي امڙ ڀاڪر پائي چميون ڏيئي خوشي وچان بيھوش ٿي وئي. اطلاع تي سوين شھرين بازياب ٿيل ٻارڙي جي گهر پھچي سندن وارثن کي مبارڪون ڏيندا رھيا. جڏهن ته ايس پي ڪشمور امجد شيخ بازياب ٿيل ٻارڙي جي گھر پهچي مبينا بازياب ٿيل ٻارڙو وارثن جي حوالي ڪرڻ کان اڳ ميڊيا سان ڳالهائيندي چيو ته ڪچي واري علائقي ۾ پوليس مقابلي بعد ٻار کي بازياب ڪرايو آهي. ايس ايس پي گرفتار ڪيل جوابدارن جا نالا ۽ انگ اکر ظاهر ڪرڻ بدران ڳالهائيندي چيو ته گرفتار ٿيل جوابدارن کان پڇا ڳاڇا جاري آهي، جڏهن ته علائقي ۾ چوٻول آهن ته ٻارڙو لکين روپيا ڀنگ ڀرڻ بعد آزاد ٿيو آهي.
