سنڌ جي وڏي وزير سيد مراد علي شاهه سنڌ ايجوڪيشن فائونڊيشن (ايس اي ايف) بورڊ اجلاس جي صدارت ڪندي ٽيڪ دي ورلڊ فائونڊيشن (ٽي ٽي ڊبليو ايف) جي سهڪار سان شروع ٿيندڙ ڊجيٽل لرننگ پروجيڪٽ جي منظوري ڏني ته جيئن اسڪولن کان ٻاهر ٻارن کي اسڪول ۾ آندو وڃي. ڊجيٽل لرننگ پروجيڪٽ جو بنيادي مقصد اسڪول کان ٻاهر ٻارن کي اسڪول ۾ آڻي صوبي ۾ تعليم جي بحران کي حل ڪرڻ جو بنياد رکڻ آهي. هن پروجيڪٽ کي ڊجيٽل لرننگ سان ڳنڍيو ويندو، جنهن جي مدد سان بحران جو مؤثر حل پيش ڪيو ويندو. اڱاري ڏينهن وزيراعليٰ هائوس ۾ ٿيندڙ اجلاس ۾ تعليم واري صوبائي وزير سيد سردار شاهه، چيف سيڪريٽري سهيل راجپوت، چيئرمين پي اينڊ ڊي حسن نقوي، قيصر بنگالي، ناڻي وارو سيڪريٽري ساجد جمال ابڙو، سيڪريٽري اسڪول ايجوڪيشن اڪبر لغاري، ايم ڊي ايس اي ايف قاضي ڪبير ۽ ٻين لاڳاپيل آفيسرن شرڪت ڪئي. ايم ڊي ايس اي ايف قاضي ڪبير سنڌ جي وڏي وزير کي بريفنگ ڏيندي چيو ته اهو ايس اي ايف- سنڌ حڪومت ۽ ٽي ٽي ڊبليو ايف جي وچ ۾ هڪ گڏيل منصوبو هوندو، جنهن سان پٺتي پيل ڪميونٽين لاءِ ڊجيٽل لرننگ جي شروعات ڪئي ويندي ۽ سندن هنر کي ورلڊ بينڪ ۽ ٻين مختلف ادارن پاران تسليم ڪيو ويو آهي. منصوبي موجب ڏکڻ سنڌ جي 10,000 اسڪول کان ٻاهر ۽ 2500 اسڪول ويندڙ ٻارن لاءِ هڪ پائلٽ پروگرام طور پراجيڪٽ شروع ڪيو ويندو. ڪاميابي جي صورت ۾ ان جو دائرو سڄي صوبي ۾ لکين تائين وڌايو ويندو. سنڌ حڪومت 42000 کان وڌيڪ اسڪول هلائي ٿي، جيڪي صوبي جي اڪثر اسڪولن جي نمائندگي ڪن ٿا ۽ SEF سان گڏيل طور تي 2,600 اسڪول هلائين ٿا. سنڌ جي وڏي وزير مراد علي شاهه چيو آهي ته سنڌ تعليم جي بحران کي منهن ڏئي رهيو آهي، يعني پهچ، معيار ۽ جوابداري جو بحران آهي. هن وڌيڪ چيو ته وضاحت جي حوالي سان هتي ڪا به ذميواري نه ڏيکاري وئي آهي ۽ تازين ٻوڏن سبب صورتحال خراب ٿي وئي آهي. تعليم واري وزير سردار شاهه چيو آهي ته روايتي طريقي سان مخصوص وقت ۾ هن بحران تي قابو پائڻ ممڪن ناهي. هن وڌيڪ چيو ته سنڌ ۾ 6 کان 7 ملين ٻارن جو اسڪول نه وڃڻ جو ڪاٿو صحيح / مستند انگ اکر ناهن پر جيڪڏهن ان ڪاٿي کي قبول ڪيو وڃي ته انهن ٻارن کي تعليم ڏيڻ لاءِ اسان کي 150000 وڌيڪ استادن ۽ 25000 نون اسڪولن جي ضرورت آهي ته جيئن ٻارن کي اسڪولن ۾ آڻي سگهجي. سردار شاهه چيو ته ڊجيٽل ٽيڪنالاجي نسبتن گهٽ وقت ۾ هن بحران کي حل ڪرڻ جو سٺو موقعو فراهم ڪري ٿي. ايم ڊي ايس اي ايف قاضي ڪبير اجلاس کي ٻڌايو ته اهو اڊاپٽيو لرننگ، اگمينٽيڊ ريئلٽي ۽ ورچوئل ريئلٽي کي قابل بڻائي سکيا جي عمل کي وڌيڪ بهتر بڻائي ٿو. اجلاس کي ٻڌايو ويو ته SEF ۽ TTWF جي تعاون سان ٻن مهينن اندر 100 ٻارن لاءِ مائڪرو اسڪول شروع ڪري سگهي ٿو ۽ ان تي 3500 رپيا في شاگرد في مهينو خرچ ٿيندو. 105 ٻارن لاءِ TTWF اِن – اسڪول پروگرامن تحت 1700 في شاگرد / في مهينو آهي. پروگرام جو انتظام هڪ سهولتڪار پاران ڪيو ويندو آهي جيڪو هڪ هفتي کان گهٽ وقت ۾ سکيا ڏيندو. سنڌ جي وڏي وزير تجويز جي منظوري ڏيندي چيف سيڪريٽري کي هدايت ڪئي ته منصوبي کي شروع ڪرڻ لاءِ فنڊ فراهم ڪيا وڃن. مراد علي شاهه ايم ڊي ايس اي ايف کي هدايت ڪئي ته ڪراچي ۽ حيدرآباد جي مضافاتي علائقن ۾ جلد 125 مائيڪرو اسڪول شروع ڪيا وڃن.
