حيدرآباد ۾ سچل سرمست ٽائون جي جيالن چيئرمين ۽ وائيس چيئرمين جي عهدن تي نامزد ڪيل اميدوارن جي نالن تي اعتراض اٿاري ڇڏيا آهن. پ پ اڳواڻن اعظم کٽياڻ، غلام اصغر کهڙو، گلاب خان خٽڪ ۽ ٻين حيدرآباد پريس ڪلب ۾ پريس ڪانفرنس ڪندي چيو ته سچل سرمت ٽائون تي چيئرمين تاج ولي پٺاڻ ۽ وائيس چيئرمين عبدالجبار جتوئي کي اميدوار نامزد ڪيو ويو آهي، جنهن تي جيالن کي سخت خدشا ۽ اعتراض آهن، ٽائون ۾ پراڻا جيالا سدائين پارٽي جي سڏ تي ڪراچي کان ڪشمير تائين تحريڪ ۾ شامل هوندا آهن، اسان جو جيئڻ مرڻ پيپلزپارٽي سان آهي پر چيئرمين ۽ وائيس چيئرمين جي عهدن تي جيالن کي نظرانداز ڪيو ويو آهي، جنهن تي کين سخت تڪليف پهتي آهي، سچل سرمست ٽائون جون سڀئي يوسيز کٽرائڻ ۾ مقامي جيالن ۽ ووٽرن جي اڪثريت شامل آهي ان ڪري ٽائون تي نمائندگي ملڻ به انهن جو حق آهي. هنن پ پ چيئرمين بلاول ڀٽو زرداري، فريال ٽالپر ۽ صوبائي صدر نثار کهڙو کان مطالبو ڪيو ته سچل سرمست ٽائون تي نامزد اميدوارن جي نالن تي نظرثاني ڪري پراڻن جيالن کي عهدن تي آندو وڃي.
