سنڌڙي: سنڌڙي ٿاڻي جي حد ڳوٺ حسين ڪالرو جي 3 ڏينهن کان گم ٿيل نوجوان ايسر ڀيل جي اغوا جي تصديق ٿي وئي. نوجوان ايسر جي موبائل نمبر تان جوابدارن وارثن سان رابطو ڪري نوجوان جي آزادي لا 15 لک رپيا ڀنگ گهري ورتو. هوڏانهن نوجوان جي وارثن بابو ڀيل، هرچند ڀيل ۽ چيتن ڀيل پريس ڪلب سنڌڙي اڳيان اڳيان مظاهرو ڪري نعريبازي ڪئي. هنن چيو ته ايسر کي 3 ڏينھن اڳ پاڙيسري نوجوان مير حسن شر موٽرسائيڪل وٺي ڏيڻ بھاني گھران سکر شھر وٺي ويو هو، جنھن بعد ۾ نوجوان کي گم ڪري ڇڏيو ۽ پاڻ واپس ڳوٺ ڦلھڏيون پھچي ويو، رات دير سان جڏھن اسان هن جي ڳوٺ وياسين ته هو ٻاهر ئي نه نڪتو ۽ صبح سکر ڏانھن نڪري ويو، اسان جي نوجوان کي مير حسن شر اغوا ڪيو آھي، اسان کي نوجوان بازياب ڪرائي ڏنو وڃي، اسان سنڌڙي ٿاڻي تي ميرحسن شر خلاف اين سي پڻ داخل ڪرائي آهي. اسان کان 15 لک ڀنگ گهريو ويو آهي. ڪارروائي ڪري اسان جي نوجوان کي بازياب ڪرائي انصاف ڪيو وڃي.
