ٺٽو/بدين: مڪلي ڀرسان خوفناڪ روڊ حادثو، 3 ڄڻا فوت، 3 عورتون ۽ 2 ٻارڙا زخمي ٿي پيا، خبر موجب مڪلي ويجھو درگاھه محمد علي شاھه ڀرسان ٺٽو-ڪراچي قومي شاھراھه تي بيٺل سوزوڪي کي تيزرفتار ٽرالر زوردار ٽڪر ھڻي ڪڍيو، جنھن جي نتيجي ۾ سوزوڪي ۾ سوار بدين واسي 3 ڄڻا فوت ٿي ويا آهن، جن جي سڃاڻپ بدين واسي ممتاز گوپانگ، ڪريم بخش سامي ۽ غلام حسين لغاري طور ڪئي ويئي آھي، جڏھن ته زخمين ۾ 3 عورتون بشيران، رخسانه، سنھري، ھڪ ورهين جي معصوم ٻارڙي ثمينه ۽ ٻيا شامل آھن.
فوتين جا لاش ۽ زخمين کي سول اسپتال ٺٽو منتقل ڪيو ويو، جتان فوتين جا لاش ضروري ڪارروائي بعد وارثن حوالي ڪيا ويا، جڏھن ته زخمين کي علاج لا اسپتال ۾ رکيو ويو آھي، حادثي جو شڪار ٿيل بدنصيب سوزوڪي ۾ سوار ماڻهن جو تعلق بدين سان ٻڌايو پيو وڃي، جڏھن ته حادثو ڪندڙ ڊرائيور ٽرالر سميت فرار ٿي ويو آهي، جنھن جي پوليس ڳولا شروع ڪري ڇڏي آھي. بدين کان ٺٽي ويندڙ سوزوڪي کي پيش آيل حادثي ۾ بدين جي نيڪ مرد حاجي صادق گوپانگ جو نوجوان پٽ ممتاز علي گوپانگ جو لاش بدين آڻڻ بعد سوين آلين اکين سان درگاهه ماھه ولي جي قبرستان ۾ مٽي ماءُ حوالي ڪيو ويو.
