سرهاڙي: سرھاڙي ۾ ھڪ ڏينهن اڳ سرھاڙي-نوابشاھه روڊ تي ڏينهن ڏٺي جو ڪتابن جي دڪانن تان ٿيل ڦر جا جوابدار گرفتار نه ٿيڻ خلاف جمالي برادري جي سوين ماڻھن ٿاڻي اڳيان احتجاجي مظاهرو ڪري ٽائرن کي باهيون ڏئي ڌرڻو هنيو ۽ پوليس خلاف نعريبازي ڪئي، احتجاج دوران شھر ۾ شٽربند ھڙتال پڻ ڪئي وئي. مظاهرين ڊاڪٽر علي خان جمالي، ظفر جمالي، غلام حسين جمالي، سڪندر جمالي ۽ ٻين جي اڳواڻي ۾ ريلي ڪڍي شهر جو گشت ڪري ٿاڻي اڳيان احتجاج ڪيو ويو. اڳواڻن ميڊيا سان ڳالهائيندي چيو ته گذريل ڏينهن ڏٺي جو اسان جي دڪان تان نامعلوم هٿياربندن يرغمال بڻائي اسان کي تشدد جو نشانو بڻايو ۽ روڪ رقم ڦر ڪئي، اسان جوابدار سڃاتا آهن، پر پوليس گرفتار ڪرڻ لا تيار ناهي. ايس ايڇ او سرھاڙي جابر حسين لاھوري ۽ وڏو منشي خالق ملاح بااثر وڏيرن جا ونگاري آهن. ٻئي طرف جمالي برادري جي معززن ۽ پوليس ۾ ڳالهيون ٿيون، پوليس ڪيس داخل ڪرائڻ جي خاطري ڪرائي ڌرڻو ختم ڪرايو. پوليس ذاڪر حسين جمالي جي فرياد تي خير الدين، نبي داد، محمد اعظم ۽ لعل محمد بروهي خلاف جهيڙي، ڀڃ ڊاهھ ۽ 47 هزار رپيا ڦر ڪرڻ جو ڪيس داخل ڪيو ۽ ھڪ جوابدار کي گرفتار ڪيو. ٻئي طرف الزام هيٺ آيل بروهي ڌر جي ماڻهن ميڊيا اڳيان احتجاج ڪندي چيو ته جمالي ڌر جي ڇوڪرن اسان جي 15 سالن جي نينگر خلاف فيڪ آئيڊيون ٺاهي غلط لفظ استعمال ڪيا، جنهن تي اسان هنن جي وڏن کي شڪايتون ڪيون، پر مسئلو حل نه ٿيو. اسان ڳالهائڻ وياسين ته هنن اسان سان جهيڙو ڪيو، جتان بچي نڪتاسين ته ڪوڙا الزام هنيا ويا، ڦر ۽ ڌاڙي جا الزام غلط آهن. هنن اعلى اختيارين کان مطالبو ڪيو ته واقعي جي جاچ ڪرائي ڪوڙو ڪيس ختم ڪرائي انصاف ڪيو وڃي.
