اسلام آباد : سڄي ملڪ ۾ ٻوڏ متاثر ڳورهاري عورتن ۽ ٻارن لاءِ هڪ خاص غذائي نمونو متعارف ڪرايو پيو وڃي. ان ڏس ۾ وفاقي حڪومت ٻوڏ سبب متاثر علائقن جي ڳورهاري عورتن ۽ ٻارن لاءِ خاص غذائي ساشي متعارف ڪرائڻ جو فيصلو ڪيو آهي. صحت واري وزارت جي ذريعن جو چوڻ آهي ته غذائي ساشي ٻوڏ متاثر علائقن ۾ موجود غذائي کوٽ جو شڪار ڳورهاري عورتن ۽ ٻارن کي فراهم ڪيا ويندا. اهي ساشي ڳورهاري عورتن ۽ ٻارن لاءِ ضروري منرلز ۽ ضروري غذائي جزن سان ڀرپور هوندا، اهو ساشي ڏينهن ۾ هڪ ڀيرو استعمال ڪري سگهبو. ذريعن موجب اهي ساشي بينظير انڪم سپورٽ پروگرام جي سهڪار سان مرحليوار ڏنا ويندا. پهرئين مرحلي ۾ 4 مخصوص ضلعن جي 4 لک عورتن ۽ ٻارن کي طبي معائني کانپوءِ غذائي ساشي فراهم ٿيندا. ذريعن جو چوڻ آهي ته هر فرد کي 7 غذائي ساشي فراهم ڪيا ويندا، هيلٿ ورڪرز غذائي کوٽ جي جاچ لاءِ ڳورهاري عورتن ۽ ٻارن جي قد، ڏورن جي ماپ ڪنديون. ذريعن موجب پهرئين مرحلي ۾ 4 لک غذائي ساشي مان 30 سيڪڙو سنڌ، 25 سيڪڙو بلوچستان، 15 سيڪڙو خيبر پختونخوا، 15 سيڪڙو پنجاب، باقي 15 سيڪڙو آزاد ڪشمير، گلگت بلتستان ۽ اسلام آباد ۾ ورهايا ويندا. ڳورهاري عورتن ۽ ٻارن لاءِ غذائي ساشي عالمي اداري يونيسيف طرفان فراهم ڪيا پيا وڃن، جڏهن ته مقامي سطح تي تيار ڪيل ساشي به فراهم ڪيا ويندا.
